نحلم

ابسط حقوق البوح

نشوف فالحلم شمس وحياه

أو ينبوع مشاعر خنقها طول السكات

أو شبح المغيب

نحلم..

والحلم جايز يكون باب المرور للنور

باب ميفرقشي بين مؤمن وعاصي

ولا بيفصل مابين سلطان مخاوي بصولجان

أو عبد بتكسره العوزه ويذلو الرغيف

نحلم..

والقلب مرعوش ضعيف

نحتمي في بكره اللي جاي من عبايه بيضا

أبيض من اللبن الحليب

من طول انتظار شجر الصبار للندى

زي الغريب لما يحس الطريق بعد طول مشوار

زي بصيص النور لما يزور الضرير

أنا قلبي زي دول تمام

عطشان يفضفض عالملأ

يفرش بحلمو النور ميخافشي الضلام

الحلم لسه بيحسوه حرام

لكني دايمًا كنت بخاف عالبشر

لو مره فاض حلمهم عالجسر

أو سرسب بشكل عشوائي وجاب النيل لغرب البلاد

راح يجرى ايه؟؟

هتفك ضفايرها البنات وتغني للقمر؟ّ

ولا برضو هتموت خجل..

لسه الخلايق في دي البلاد

بتخبي دايما حلمها

وتموت عطش..

لسه الحلم جوانا بيموت بطئ