زى مايكون عدى يوم
الف ساعه كل يوم
امس مولود النهارده
بكره شايل الف ورده
كل لحظه تايهه شارده
واحنا مرضى بالمحبه والجنون
وش لازق فى المخده
حلم والاحلام وحيده
فركشت روحى القصايد
والحروف غنت غناويها السعيده
عن جثث بتشيل جثث
عن بيوت حاضنه بموده
حيط وقع على كتف صوره
فيها ضحكه بنت بيضا
للى باقى م الحيطان
واللى فاضل م الشوارع
دمع نازل دم طالع
زى مايكون عدى يوم
الف ليله فى ثانيه واحده
زى مايكون عدى دهر
الف ليله وليله قهر
سيف على رقبه حبيبى
سيف على رقبه حبيتى
سيف يجز الفرحه جز
ترقص المدبوحه رقصتها البهيجه
من ورا الشباك شايفها
والستاير شايله طيفها
نور طالقها وليل حابسها
والخيال بيصيد غزال
دمه سايح من زمان
بين بحورها وبين ضفافها
ياغريقها مدايدك للغريق
,العزيق مابقاش عزيقها
ضاع طريقك غاب طريقها
لا صباحى بل ريقى
ولا صباحها بل ريقها
زى مايكون عدى دهر
قهر بيجرجر فى قهر
