المشهد الأول
ابتدا كل واحد يقفل شنطته
بعد ما ودع صحابه
وابتدا يركب مع عشقه الكبير
عشمان باللقا .. فات الكتير
إنما فاضل علىاكتمال تعاشيق الحنان
ساعات ..
المشهد الثاني
وبعد الإجراءات
وقاعدة جوه بوفيه صالة المغادرة
في انتظار آخر ندا
دوامات في الراس بتوجع
والوطن شكله اترسم جوه البدن
يا هلترى
لساه بيضحك زي آخر مرة
شوفته فيها ؟
لسه البيوت بتعاني من كتر السفر ؟
لسه الهرم
واقف ورا أبو الهول
مستني برضو رجعتي ..؟
المشهد الثالث
الوقت بيمر بكسل
الرحلة دي مالها كده ..؟
……………………………
وأخيراً
ميكروفون الاستعلامات ذاع الخبر
آن الأوان نبدأ بقى
كلنا حاسين بشئ غريب
إنما ..
حاولنا ننكر شعورنا بالخطر
وابتدا كل واحد يقرا ف دعاه
أو ترانيم السفر ..
والهدوء ساد المكان
لما استقرينا بسلام وسط السحاب ..
المشهد الرابع
السكة بدأت من هنا
وبدأنا حل الأحزمة
فاتت دقايق ــ لأ ثواني
إيه حصل ..؟ !
التكبيرات
هزت سكون سطح المحيط
أشهد أنـــ
المشهد الخامس
الوطن في توبه الأسود
ساند الراس بالكفوف
والكفوف عماله تضرب بعضها
دا مش جنون
إنما
كان الوطن بيبكي عمره اللي اتخطف
على الملأ ..
المشهد الأخير
ساعة الغروب
كل واحد جواه أمل
يرجع بعمره اللي اتخطف
جوه الكفن
كان وهم حلو استبدلوه
بزهور وحبة ترنيمات
خدها المحيط
ورجعنا تاني يا وطن
شايلين فلوس وشكوك بتغلب ظننا
بس الولاد رافضه تصدق إن دا
كان القدر ..
السقوط لقاع المحيط كلاكيت آخر مرَّة
By: Hamed Anwar - on: Friday 24 November 2017 - Genre: Poetry
Upcoming Events
Joseph Conrad's Heart of Darkness Discussion
April 27, 2024
Join us for a special discussion of Joseph Conrad&...
A writer, a vision, a journey: a conversation with Francis Boyle
February 24, 2024
This event took place on 24 February 2024 Yo...
Discussion of Fawzia Assaad’s An Egyptian Woman
November 25, 2023
In celebration of the life and outstanding achieve...
Toni Morrison's The Bluest Eye, A Presentation and Discussion
October 28, 2023
This presentation and discussion of Toni Morrison&...