Home
ركن الأدب

جلا جلا 


صفحة البيت

بيت الكاتب العربى

المكتبة

نادى القراء

ورشة فن الكتابة

ركن الأدب

مقالات

 من الأخبار

ركن الحوار
أحداث بارزة

فهرس للصفحات العربية

اتصل بنا

منتدى الكتاب العربى

مجلس الأمناء
فى أجهزة الإعلام
خدمات
بحث

 


شعر
: أحمد عبد الحكم أبوالحسن
مصر - قنا

 

حاشا وكلا
أنا مش من الحاشية
ولا كنت يوم إمعة
ولا كنت منحلا
ولا راسى مرة انحنت
غير بس للمولى

لفيت حوارى البلد
غوطت فى الوحلة
شافنى الوطن حاير
فاتنى بلا حول
ما نابنى غير الوجع
ف نهاية الرحلة

لفيت مع الدراويش
وذكرت فى الحضرة
طولت فى الأدعية
وتهت فى القبلة
دخلت بيت الأفاعى
طلع البدن بكام لدغة
لكنى كنت الرفاعى
لابس الزعبوط مع الشملة
وما نابنى غير الوجع
ف نهاية الرحلة

غلبت كل التلامذة
ف حصة الإنشا
لكنى بغرابة
سقطت فى الإملا
لما زوقت الحروف
وسندت قلبى الضعيف
بين النقطة والفصلة

ودخلت وسط الصفوف
أنادى بمظاهرة
لقيتنى فجأة ف لومان
وبالعب الحجلة
فرجة لوشوش متكدرة وكحلة
وما نابنى غير الوجع
ف نهاية الرحلة

جربت عشق الصبايا
واكتفيت م الهوى بالفراق
ما دقت طعم القبلة
ضيعت كبشة سنين
فى الغرام الذى ولىّ
جبت النياق الحمر
لكن زحمة المولد
ضيعت عبلة

حاربت جيش الأعادى
بالفاسة والنبلة
كنت مكشوف الغطا
والحلم فى ليل الشتا أحلى
وبكل ما عندى من عناد
إحتملت وقت البلا
بلا خوف بلا دلدلة
إنما بضحكة بتعلا
حتى وقت البهدلة
الوصلة متوصلة
بحتة مقطوعة
والحلم متخبى ف صندرة

جلا جلا
قلبى انجلى
أنا الإمام المبتلى
بالفقر قبل الغلا
بالموت قبل الغرغرة
بالضحكة فى وقت البلا
أنا الإمام المبتلى
حتى لو فاتتنى ركعة
قلبى سجادة صلا

 

**********************

أول الصفحة


 © Arab World Books